राष्ट्रिय परीक्षा बोर्ड २०७९ को माध्यमिक शिक्षा परीक्षा (एसईई) को नतिजा सार्वजनिक गर्ने अन्तिम चरणमा पुगेको छ । तर नतिजा कुन लेटर ग्रेडिङ (संशोधन अघिको वा संशोधन सहितको) निर्देशिका अनुसार गर्ने भन्ने विषयमा भने अझै निर्णय गर्न सकेको छैन ।
२०७८ पुस ७ गते मन्त्री स्तरीय निर्णयले पहिलो पटक लेटर ग्रेडिङ निर्देशिका, २०७८ जारी गरेको थियो । सो निर्देशका जारी भएको केही महिना पछि वा २०७८ फागुन १८ गते पहिलो संशोधन गरी सैद्धान्तिकतर्फ ३५ भन्दा कम अङ्क ल्याउने विद्यार्थीको नतिजामा अवर्गीकृत (नन ग्रेडेड) लेखिने र मूल प्रमाणपत्र नदिने व्यवस्था गरेको थियो ।
तर गतवर्ष कोरोना महामारीको असरका कारण पठनपाठन सहज नभएको हुँदा विद्यार्थीमा मार पर्ने भन्दै बोर्डले पुरानै ग्रेडिङ प्रणाली अनुसार नतिजा निकालेको थियो । यो वर्ष भने के गर्ने भन्नेबारे बोर्डमा छलफल चलिरहेको बताएको छ ।
बोर्डले यो हप्ता यस विषयम निर्णय गरेर नतिजा सार्वजनिक गर्ने तयारी गरिरहेको परीक्षा नियन्त्रक विष्णुनारायण श्रेष्ठले बताए । लेटर ग्रेडिङ पद्धति २०७२ मा अनुसार नतिजा प्रकाशित गर्दा ३० देखि ४० अंक, २० देखि ३० र २० भन्दा कम अंक ल्याउने विद्यार्थीको पनि ग्रेडिङ हुन्छ ।
बार्षिक कार्यतालिका अनुसार नै नतिजा प्रकाशन हुने
एसईई परीक्षाको नतिजा असार तेस्रो हप्ता सार्वजनिक गर्ने तयारीमा बोर्ड जुटेको छ । नियन्त्रक श्रेष्ठका अनुसार अहिले बोर्ड विद्यार्थीको प्राप्ताङ्क इन्ट्री सकेरे अन्तिम चरणको अङ्क पुनर्जाँचको काम तीव्र गतिमा गरिरहेको छ ।
२०७९ चैत १७ गतेदेखि भएको एसईईमा चार लाख ८५ हजार ३९६ विद्यार्थी सहभागी थिए ।
२हजार ३७ परीक्षा केन्द्रबाट लिएको सो परीक्षामा विगतका वर्षहरूमा भन्दा यो वर्ष नतिजामा त्रुटि हुन नदिन बोर्ड लागिपरेको नियन्त्रक श्रेष्ठ बताउँछन् । नतिजा सकेसम्म चाँडो सरोकारबाला समक्ष पुर्याउने बोर्ड नतिजा सार्वजनिक गर्न इच्छिुक संस्थाबाट यस अघि नै आवेदन मागका लागि सार्वजनिक सूचना जारी गरिसकेको छ ।
एसईईमा पहिलो पटक
नियन्त्रक श्रेष्ठका अनुसार यो वर्षको एसईई परीक्षा परीक्षामा अपाङ्गता मैत्री प्रश्नपत्र तयार गरिएको थियो । दृष्टि विहीन विद्यार्थीका लागि स्रोत केन्द्रलाई नै परीक्षा उपकेन्द्र बनाइ परीक्षा सञ्चालन गरिएको थियो । त्यसैगरी पहिलो पटक विज्ञान, अङ्ग्रेजी र सामाजिकमा बैकल्पिक प्रश्न समावेश गरिएको थियो ।
यो वर्षको एसईईमा विज्ञान, अङ्ग्रेजी र गणितको परीक्षा स्तरीकृत प्रश्नपत्रबाट लिएको थियो ।स्तरीकृत प्रश्नपत्रको माध्यमबाट परीक्षा लिँदा पाँच वर्ष सम्म प्रश्न नदोहोरिने, तथा दोहोरिने क्रम शून्य हुने नियन्त्रक श्रेष्ठ बताउँछन् ।
एसईईको नतिजा सार्वजनिक भए लगतै see.edusanjal.com बाट हेर्न सकिने छ ।
