गत साता टनकपुर तथा भारतका विभिन्न स्थानमा शैक्षिक भ्रमणको लागि गएका विद्यालयको टोलीका सदस्यलाई कोरोना संक्रमण देखिएपछि बैशाख २ गते सम्मका लागि विद्यालय बन्द गरिएको छ ।
बुटवलको कालिका मानवज्ञान माविबाट शैक्षिक भ्रमणमा गएका सात जना शिक्षकहरूलाई कोरोना संक्रमण देखिएपछि विद्यालय बन्द गरिएको हो ।
सो विद्यालयका प्रधानाध्यापकसहित बुटवल उप(महानगरपालिकाका करिब सय जना शिक्षकहरू शैक्षिक भ्रमणमा गएका थिए । भ्रमण टोलीका सात जनामा कोरोना संक्रमण पुष्टि भएको छ भने अरूअन्य सबै शिक्षकहरू होम–आइसोलेसनमा राखिएको बुटवल उपमहानगरपालिकाका स्वास्थ्य तथा शिक्षा महाशाखा प्रमुख मित्रमणि खनालले जानकारी दिए ।
‘कालिका मानव ज्ञानका सात जना शिक्षकहरूलाई कोरोना संक्रमण देखिएपछि गत शुक्रबारदेखि विद्यालय बन्द गरिएको छ ।’ उनले भने, ‘संक्रमित शिक्षकलाई होम–आइसोलेसनमा राखिएको छ भने भ्रमणदलका अन्य सदस्यलाई साबधानी अपनाउँदै होम क्वारेन्टाइनमा बस्न सल्लाह दिइएको छ ।’
