विद्यालय कसरी सञ्चालन गर्ने भन्ने विषय शिक्षा, विज्ञान तथा प्रविधि मन्त्रालयले भोलि विहान आठ बजेदेखि छलफल गर्ने भएको छ । पछिल्लो हप्ता १५ प्रतिशत बालबालिकामा संक्रमण भएको फेलापरेपछि मन्त्रालयले छलफलका लागि बोलाएको हो ।
कोभिड संकट व्यवस्थापन केन्द्र (सीसीएमसी) को शनिबार बसेको बैठकले पनि संक्रमण बढी भएका स्थानका विद्यालय तथा कलेजहरू कम्तीमा ३ सातासम्म बन्द गर्न प्रस्ताव आएपछि शिक्षा, विज्ञान तथा प्रविधि मन्त्रालयले सरोकारवालाको बैठक बोलाएको छ । भोलि बिहान (सोमबार ८ बजे) मन्त्रालयमै छलफल गर्नेगरी मन्त्रालयले सरोकारवालासंग छलफल गर्ने भएको छ ।
भोलिको सरोकारवालाको छलफल पछि कोरोना संक्रमण दर बढ्दा विद्यालय सञ्चालन गर्ने कि बन्द गरेर अनलाइन माध्यमबाट पढाउन थाल्ने भन्ने निर्णय हुन सक्ने मन्त्रालय स्रोतले जानकारी दियो ।
बालबालिकामा कोरोना भाइरसको नयाँ स्वरूप (युके भेरियेन्ट) को संक्रमण उच्च देखिएको छ । पछिल्लो एक हप्तामा १८ वर्ष मुनीका संक्रमित मध्ये दैनिक १५ प्रतिशत बालबालिका रहेको स्वास्थ्य मन्त्रालयले जानकारी दियो ।
|
स्रोत स्वास्थ्य मन्त्रालय
स्वास्थ्य मन्त्रालयका प्रवक्ता जागेश्वर गौतमका अनुसार हिजो ३३७ जना संक्रमित मध्ये ५२ जना १८ वर्ष मुनिका बालबालिका रहेका छन् । त्यसैगरी शुक्रबार कुल २८८ जना संक्रमित मध्य ३४ जना बालबालिका रहेका छन् । त्यसैगरी विहिबार ३३२ जना संक्रमित मध्ये ५१ जना बालबालिका संक्रमित भएका थिए । बुधबार कुल संक्रमित २९८ जना मध्ये २५ जना बालबालिका १८ वर्ष मुनिका रहेका छन् ।
