विद्यालय बन्द गरिएकोमा स्पष्टीकरण माग

नवलपरासी (बर्दघाट सुस्ता पूर्व) को दुम्किबासस्थित विनयी त्रिवेणी गाउँपालिकाले हिजो (असार ३) गते आइतबार विद्यालय बन्द गरेकामा सबै सामुदायिक विद्यालयलाई स्पष्टीकरण सोधेको छ ।

गाउँपालिका अध्यक्ष घनश्याम गिरीले आज (सोमबार) विद्यालयहरूलाई स्पष्टीकरण सोधका हुन् ।

विद्यालय कर्मचारीका संस्थाहरूको आह्वानमा आइतबारदेखि विद्यालय बन्दको घोषणा गरिएको थियो । तर अपरान्ह आन्दोलन स्थगन गरिएको थियो । वार्ताबाट समस्या समाधान गर्ने भन्दै आन्दोलन स्थगनको घोषणा गरिएको थियो ।

गाउँपालिकाले विद्यालय शान्ति क्षेत्र राष्ट्रिय ढाँचा र कार्यान्वयन निर्देशिकाले कुनै पनि दलीय राजनीतिक तथा अन्य स्वार्थका लागि विद्यालय बन्द–हड्ताल र पठनपाठन अवरोध गर्ने जस्ता क्रियाकलाप गर्न नमिल्ने व्यवस्था रहेको भन्दै केकति कारणले विद्यालय बन्द गरिएको सो बारेमा तीन दिनभित्र स्पष्टीकरण पेस गर्न भनिएको छ । स्पष्टीकरण गाउँपालिकाको शिक्षा शाखामा पेस गर्नुपर्ने छ । स्पष्टीकरणको बोधार्थ शिक्षक महासङ्घ नवलपरासी (बर्दघाट सुस्ता पूर्व) लाई दिइएको छ ।

Thuprai - Books and E-books