त्रिभुवन विश्वविद्यालयले आगामी पुसमा हुने आफ्नो ४६ औं दीक्षान्त समारोहमा करिब ५७ हजार विद्यार्थीलाई दीक्षित गर्ने भएको छ । त्रिविले ६१ औं वार्षिक दिवसका अवसरमा विभिन्न संकायका विद्यार्थीलाई दीक्षित गर्ने निर्कोल गरेको हो । विभिन्न संकायबाट उच्च शिक्षा हासिल गरेका ५६ हजार सात सय १३ जना विद्यार्थी दीक्षित हुने भएका हुन् ।
दीक्षित हुने मध्ये व्यवस्थापन संकायका १९ हजार २३०, शिक्षा शास्त्र संकायका १४ हजार ८१२, मानविकी तथा सामाजिक शास्त्र संकायका ९ हजार ६१५, कानुन संकायका एक हजार नौ सय १५ जना दीक्षित हुने भएका हुन् । त्यसैगरी विज्ञान तथा प्रविधि अध्ययन संस्थानका ६ हजार १२६, इन्जिनियरिङ अध्ययन संस्थानका दुइ हजार ८४४, चिकित्सा शास्त्र अध्ययन संस्थानका १ हजार ४५२, कृषि र पशु विज्ञान अध्ययन संस्थानका ३९७ र वन विज्ञान अध्ययन संस्थानका २२२ जना दीक्षित हुने त्रिविका उपकुलपति प्रा.डा.धर्मकान्त बाँस्कोटाले जानकारी दिए ।
त्रिविका सहकुलपति समेत रहेका शिक्षा विज्ञान तथा प्रविधि मन्त्री गिरिराजमणि पोखरेलको अध्यक्षतामा भएको त्रिविको ६१ औं वार्षिक दिवसमा उपकुलपति बाँस्कोटले सो जानकारी दिएका हुन् ।
