वैदेशिक अध्ययन अनुमति शाखा (एनओसी) शाखाका तत्कालीन प्रमुख शान्ति राम पौडेलले गत फागुन ३० गते काम गर्न नसकेको कारण देखाउँदै सामाजक सञ्जालमार्फत आफ्नो राजिनामा सार्वजनिक गरे । उनले तैत्र एक गते विधिवत रुपमा राजिनामा दिए । उनको राजिनामा भएको समयमा एनओसीका लागि आवेदन दिएका करिब ९ हजार विद्यार्थी प्रतिक्षामा थिए । उनको राजिनामापछि अवलोकन गर्न पुगेकी शिक्षामन्त्री सुमना श्रेष्ठले सहयोग गर्ने प्रतिवद्धता गरेर फर्किइन् । शाखाको जिम्मेवारी वासुदेव वस्तीलाई मन्त्रालयले सुम्पियो ।
शाखामा आउन साथ उनले सात दिन पछि भीड व्यवस्थापन गर्र्ने प्रतिवद्धता व्यक्त गरेका थिए । उनले जिम्मेबाी सम्हालेको समयमा ८ हजार १८४ आवेदक एनओसीको प्रतिक्षामा थिए । दैनिक १५ सय आवेदकको आवेदन प्रमाणीकरण गरी एनओसी प्रदान गर्ने लक्ष्यका साथ काम गर्न जुटेको शाखाले लक्ष्यभन्दा बढीको आवेदन सत्यपान गरी दैनिक १५ सयभन्दा बढी विद्यार्थीलाई एनओसी प्रदान गरिरहेको छ ।
अहिले आवेदन दिएर प्रतिक्षामा रहेका विद्यार्थीको संख्या घटेर २ हजारको हाराहारीमा झारिएको शाखाले जानकारी दियो । शाखाका अनुसार हिजो साझसम्म एनओसीको प्रतिक्षामा रहेका २ हजार ४४२ जना मात्र रहेका छन् । हिजो मात्र शाखाले र्२ हजार ८९ जनालाई एनओसी प्रदान गरेको छ भने १८ सय ४० जनाको आवेदन रुजु गरेको छ । हिजो मात्रै ६५० जना नयाँ विद्यार्थीले एनओसीका लागि आवेदन दिएका छन् ।
शाखाका अनुसार फागुनमा मात्रै १३ हजार ९४५ जनाले एनओसी लिएका छन् । चालु आर्थिक वर्षको फागुन मसान्तसम्म ७१ हजार ६३ जनाले एनओसी लिएको शाखाले जानकारी दियो । शाखाका अनुसार पछिललो समय जापान र कोरियाका लागि धेरै विद्यार्थीले एनओसी लिएका छन् ।
फागुनमा जापानका लागि ८ हजार ९१ जनाले एनओसी लिएका छन् भने अस्ट्रेलियाका लागि दुई हजार ६१०,क्यानडा एक हजार ६६०, बेलायतका लागि ५५९, भारत २३४, युएई १६९, दक्षिण कोरियाका लागि १२५ एनओसी लिएका छन् ।
