छात्रवृत्ति छनोट परीक्षाको नतिजा प्रकाशन भएपश्चात् मात्र विद्यार्थी भर्ना हुन विद्यार्थीहरूमा अपिल
काठमाडौं महानगरपालिकाले कक्षा ११ मा छात्रवृत्ति कोटामा अध्ययन गर्न चाहने विद्यार्थीहरूबाट अनलाइन आवेदन माग गरेको छ ।
महानगरपालिका अन्तर्गतका सस्थागत शिक्षण सस्थामा कक्षा ११ मा भर्ना भई छात्रवृत्तिमा कोटामा अध्ययन गर्न चाहने विद्यार्थीहरूलाई परीक्षा प्रणालीबाट छात्रवृत्ति उपलब्ध गराइने उद्देश्यले आवेदन माग गरेको हो ।
इच्छुक विद्यार्थीले असार १५ गते बिहान १०ः०० बजेदेखि असार २९ गते शनिबार राती ११ः५९ बजेसम्म आवेदन दिन सक्ने महानगरपालिकाद्वारा जारी सूचनामा उल्लेख छ ।
महानगरपालिकाले छात्रवृत्तिका लागि लिने परीक्षामा माध्यमिक तह कक्षा १० को पाठ््यक्रममा आधारित १०० वटा बहुवैकल्पिक (वस्तुगत) प्रश्न सोद्ने जनाएको छ । छात्रवृत्तिका लागि छनोट परीक्षा साउन ४ गते बिहान ८ बजेदेखि १०बजेसम्म लिने सूचनामा उल्लेख छ ।
विद्यालयगत छात्रवृत्तिको कोटा र परीक्षा केन्द्र सम्बन्धी अन्य विवरण पछि प्रकाशन गरिने महानगरले जनाएको छ ।
छात्रवृत्तिको नतिजा प्रकाशन भएपश्चात् मात्र विद्यार्थी भर्ना हुन विद्यार्थीहरूमा अपिल समेत गरेको छ । नतिजा प्रकाशन हुनु अगाडि नै भर्ना भएका विद्यार्थीहरूलाई छात्रवृत्ति प्राप्तिका लागि सहजीकरण गर्न नसकिने सूचनामा भनिएको छ ।
