त्रिपुरेश्वरस्थित विश्व निकेतन माध्यमिक विद्यालयले आज आयोजना गरेको हीरक महोत्सवमा २०७७ को एसईईमा ४.०० जीपीए ल्याउने एक विद्यार्थीलाई प्रमाणपत्र, ९ ओटा पदक र ९ शीर्षकमा नगद पुरस्कार प्रदान गरेको छ । उत्कृष्ट विद्यार्थी तथा शिक्षकलाई सम्मान गर्दै विद्यालयले आज आफ्नो स्थापनाको ७५ औं वर्षगाठमा विद्यार्थी अभिषेक सुवेदीलाई सातओटा पदक प्रदान गरेको हो ।
विद्यार्थी सुवेदीलाई नरमान स्मृति पदक तथा पुरस्कार, रतीराम अग्रवाल नगद पुरस्कार, जुलुम मास्के तथा चन्द्रमान मास्के पुरस्कार, लक्ष्मण विक्रम पुरस्कार, नेत्रप्रसाद शर्मा (सिलवाल) र सुरेन्द्र जया स्मृति पुरस्कार लगायत प्रमाणपत्र सहित ९ ओटा पदक र ९ ओटा शीर्षकमा नगद पुरस्कार प्रदान गरेको छ ।
सो महोत्सवमा विद्यालयले २०७७ सालको एसईईमा ३.६–४ जीपीए ल्याउने सुवेदी सहित सबै विद्याथीलाई पुरस्कृत गरेको छ । सोही वर्षको एसईईमा विषयगत रुपमा उत्कृष्ट विद्यार्थी, कक्षा ११ र १२ का उत्कृष्ट विद्यार्थी, २०७७ मा नै पूर्व प्राथमिक देखि कक्षा ९ सम्मका प्रथम, दृतीय र तृतीय प्राप्त गर्ने विद्यार्थीलाई विभिन्न पदक तथा पुरस्कार प्रदान गरेको छ ।
यसैगरी सो विद्यालयमा लामो समय काम गर्ने शिक्षक तथा कर्मचारीलाई पनि विभिन्न शीर्षकमा पदक तथा सम्मान प्रदान गर्दै महोत्सव सम्पन्न भएको हो ।
उक्त महोत्सवमा आधारभूत तहका छात्रतर्फ उच्चतम अंक ल्याउने छात्रछात्रालाई शान्ति मानन्धर स्मृति नगद पुरस्कर, प्राथमिक तहको उत्कृष्ट छात्रछात्रालाई सुशीला दाहाल नगद पुरस्कार प्रदान गरेको छ भने, प्राथमिक तहकै दुई जनालाई मीनु ज्ञावली नगद पुरस्कार प्रदान गरेको छ ।
उक्त महात्सवमा २०७७ को एसईईमा ३.६–४ जीपीए ल्याउने ४८ जनालाई विद्यालयले सम्मान गरेको छ । त्यसैगरी विद्यालयमा स्थापना गरिएको नरमान स्मृति पदक तथा पुरस्कार ६ जनालाई, रतीराम अग्रवाल नगद पुरस्कार ६ जनालाई, जुलुम मास्के तथा चन्द्रमान मास्के पुरस्कार ४ जनालाई, लक्ष्मण विक्रम पुरस्कार दुई जनालाई प्रदान गरेको छ ।
त्यस्तै कक्षा ११ को २०७८ को परीक्षामा विभिन्न समूहमा उत्कृष्ट विद्यार्थीलाई प्राडा तुलसीराम बैद्य पुरस्कार एक जनालाई, विश्व निकेतन मावि नगद पुरस्कार एक जनालाई प्रदान गरेको छ । त्यस्तै स्व. अनिशा–सन्ध्या स्मृति पदक पुरस्कार ४ जनालाई, स्व. अनिशा–सन्ध्या स्मृति नगद पुरस्कार ८ जनालाई प्रदान गरेको छ ।
त्यसैगरी कक्षा १२ को २०७८ कै परीक्षामा उत्कृष्ट विद्यार्थीलाई माधवप्रसाद अधिकारी स्मृति पुरस्कार २ जनालाई, मोतिकाजी स्मृति पदक एक जनालाई, भोषराज शर्मा स्मृति नगद पुरस्कार चार जनालाई , नेत्र प्रसाद शर्मा (सिलवाल) स्मृति नगद पुरस्कार दुई जनालाई, सुरेन्द्र जया स्मृति नगद पुरस्कार दुई जनालाई प्रदान गरेको छ ।
सार्वजनिक शिक्षालाई गुणस्तरीय बनाइनेछः शिक्षामन्त्री पौडेल
शिक्षा, विज्ञान तथा प्रविधिमन्त्री देवेन्द्र पौडेलले नेपाललका सार्वजनिक विद्यलायलाई गुणस्तरीय छन् भन्ने विश्वास दिलाउन शिक्षकको सक्रियता आवश्यक रहेको बताएका छन् । विश्व निकेतन माविको हीरक महोत्सव समारोहलाई आज सम्बोधन गर्दै उनले शिक्षकको सक्रियताको आवश्यकतालाई महसुस गर्दै नेपाल शिक्षक महासङ्घसँग छलफल गरेर शिक्षकका माग सम्बोधनका लागि सरकारले सहमति गरेको धारणा व्यक्त गरे ।
मन्त्री पौडेलले दश वर्षे शिक्षा सुधारका कार्ययोजना तर्जुमा हुँदै गरेको र सार्वजनिक शिक्षालाई गुणस्तरीय बनाउन सरकार र सबैले साझा सङ्कल्प गर्नुपर्नेमा जोड दिए ।
उनले सामुदायिक विद्यालयलाई भौतिक पूर्वाधार, शैक्षिक सुधार र कार्यक्रमिक सुधारका लागि सरकारले नीति र बजेट दिइरहेको अवगत गराउँदै शिक्षण सुधार प्रक्रियाका लागि सरकार सदैव तत्पर रहेको बताए ।
विद्यालयका प्रधानाध्यापक हेरम्बराज कँडेलले विद्यालयका शिक्षक, अभिभावक र विद्यार्थीको सहकार्य र मेहनताका कारण विद्यालयको शैक्षिक स्तरमा सुधार आएको बताए ।
१० लाखको अक्षयकोष स्थापना
हीरक महोत्सवकै अवसरमा विद्यालयमा ‘पद्य ज्योती तथा मिरा ज्योती’ नामक अक्षयकोषको स्थापना गरिएको छ । वार्षिक रुपमा उत्कृष्ट शिक्षक विद्यार्थीलाई पुरस्कृत गर्ने उद्देश्यले रु. १० लाखको अक्षयकोषको स्थापना गरेको सौरभ ज्योतीले घोषणा गरेका हुन् ।
आफ्ना बुबाआमाको नाममा हीरक महोत्सवका अवसरमा ज्योतीले सार्वजनिक रुपमा अक्षयकोष स्थापना गरिएको घोषणा गरेका छन् ।
