चिकित्सा शिक्षातर्फका सैद्धान्तिक कक्षाहरु अनलाइनमार्फत सञ्चालन हुँदै आए पनि अनलाइनको पहुँचभन्दा बाहिर रहेका केही विद्यार्थीहरुलाई अफ्ठेरो परेको छ ।
कतिपय विद्यार्थीहरु घर गएको र मोबाइलमा नेटवर्क नटिप्ने समस्याका कारण अनलाइन कक्षामा सहभागी हुन बञ्चित भएका छन् । अहिले अनलाइनमार्फत त्रिभुवन विश्वविद्यालय र काठमाडौं विश्वविद्यालयले धमाधम कक्षा सञ्चालन गर्दै आएका छन् । त्रिविअन्तर्गत १० वटा मेडिकल कलेज छन् । यस्तै काठमाडौं विश्वविद्यालय अन्तर्गत् ११ वटा मेडिकल कलेज छन् । पोखरास्थित गण्डकी मेडिकल कलेजमा अध्ययनरत विद्यार्थी अनित सिन्हका अनुसार सरकारले नेपाल टेलिकमको सेवा सहज र सरल तरिकाले प्रवाह गर्नुपर्छ हुन्छ । उनले भने, ‘हाम्रो क्लासमा ९१ जना विद्यार्थी छौं । नेटवर्कको समस्या भएपछि तीन जना अनलाइन कक्षा लिनबाट बञ्चित भएका छन् । दिनको एउटा विषयको कक्षा सञ्चालन हुँदै आएको छ ।’
उनले छुटेका विद्यार्थीको लागि कलेजले विशेष ध्यान दिनुपर्ने बताए । चिकित्सा शिक्षा अध्ययन गर्दै आएका विद्यार्थी सुजन कडरियाले केही विश्वविद्यालयले अनलाइनबाट समेत परीक्षा लिने भनेर विद्यार्थीलाई आग्रह गरेको बताए । उनले भने, ‘कक्षा सञ्चालन हुनु त राम्रो हो । तर यो कक्षालाई आधिकारिक मान्यता दिनुहुँदैन ।’
पाटन स्वास्थ्य विज्ञान प्रतिष्ठानमा अध्ययनरत विद्यार्थी कृष्णकुमार गुप्ताले हरेक विद्यार्थीसँग गुणस्तरीय इन्टरनेटको पहुँच नभएको हुँदा इन्टरनेट सेवा प्रदायक र दूरसंचार सेवा प्रदायकसँग आवश्यक समन्वय गरी लकडाउन अवधिसम्म हरेक विद्यार्थीलाई सहज र सर्वसुलभ इन्टरनेट सेवा प्रदान गरिदिन सरकारलाई आग्रह गरे ।
चिकित्सा शिक्षातर्फ हाल सञ्चालन भइरहेको अनलाइन कक्षाले मान्यता पाउने भएको छ । लकडाउनको अबधि लम्बिएको र कहिलेसम्म भन्ने टुगों नलाग्दा वार्षिक तालिका खलबलिने भन्दै अनलाइन कक्षालाई मान्यता दिएको बताइएको छ । त्रिभुवन विश्वविद्यालय प्राज्ञिक परिषद्ले अनलाइन कक्षा निर्देशिका २०७७ स्वीकृत गरिसकेको छ । नेपाल मेडिकल काउन्सिलले अनलाइन कक्षालाई मान्यता दिएको जनाएको छ ।
काउन्सिलका सदस्य डा.कालुसिंह खत्रीले सैद्धान्तिक कक्षा कलेजहरुले सञ्चालन गरिरहेको भन्दै यसैलाई आधिकारिक मान्यता दिइने बताए । प्रयोगात्मक कक्षाका सन्दर्भमा कलेजसँग छलफल चलिरहेको भन्दै उनले थपे, ‘अनलाइन कक्षामा प्राक्टिकल कक्षा चाहिँ सम्भव छैन तर, सैद्धान्तिक कक्षालाई मान्यता दिएका छौँ । पहुँच नहुनेको लागि कक्षा दोहोर्याउन सकिन्छ ।सैद्धान्तिक कक्षा भनेको एउटै क्लासमा राखेर गर्ने हो । अनलाइन कक्षा गराइएन भने भोलि छ वर्षको कोर्स सात वर्ष लाग्यो भने विद्यार्थी पनि त मारमा पर्छन् ।’
उनले अर्थ र समयकाे लगानी खेर जानसक्ने भएकाेले सैद्धान्तिक कक्षा अनलाइनबाट भएकोलाई आधिकारिक मान्नुपर्ने बताए । अनलाइनबाट रिसर्च गर्न मिल्छ । इन्टरनेटको पहुँच पुर्याउन र सहज बनाउन सरकारले बरु विशेष ध्यान दिनुपर्ने बताए । प्रयोगात्मक कक्षाको सन्दर्भमा कलेजहरुसँग छलफलमा रहेकाे उल्लेख गर्दै उनले यातायात सहज भएपछि विद्यार्थीहरुलाई सामाजिक दुरी कायम गराएर प्रयोगात्मक कक्षा अघि बढाउने योजनामा रहेकाे बताए ।
