कक्षा ११ को वार्षिक परीक्षा आगामी असार महिनाभित्र सञ्चालन गरिसक्नुपर्ने भएको छ ।
राष्ट्रिय परीक्षा बोर्डका परीक्षा नियन्त्रक कृष्णप्रसाद शर्माले आगामी असार महिनाभित्र कक्षा ११ को परीक्षा सम्पन्न गरिसक्न विद्यालयहरूलाई परिपत्र गरिने जानकारी दिए ।
कक्षा ११ को परीक्षा विद्यालयले नै सञ्चालन गर्नुपर्ने प्रावधान बनाइएको छ । विद्यालय आफैँले प्रश्नपत्र तयारीदेखि नतिजा प्रकाशन गर्नुपर्ने हुन्छ । विद्यालयले मार्क लेजर बोर्डको सम्बन्धित जिल्ला वा प्रदेशस्तरीय कार्यालयमा बुझाउनुपर्ने हुन्छ । कक्षा ११ मा न्यूनतम ३५ प्रतिशत अर्थात् विषयगत रूपमा डीप्लस ल्याएको हुनुपर्छ । सोभन्दा कम प्राप्त गर्नेले कक्षा १२ को परीक्षामा सम्मिलित नगराउने व्यवस्था छ ।
यसैबीच बोर्डले कक्षा १० मा विज्ञान, गणित र अङ्ग्रेजी विषयको स्तरीकृत परीक्षा सञ्चालन गरेको छ ।
देशका ४२ विद्यालयका पाँच हजार विद्यार्थीमा यस्तो परीक्षा सञ्चालन गरिएको छ । यस्तो परीक्षा पहिलोपटक सञ्चालन गरिएको हो र यस वर्षको एसईईमा सहभागी हुने विद्यार्थीहरूलाई नै स्तरीकृत परीक्षामा सम्मिलित गराइएको थियो ।
बोर्डका अध्यक्ष डा. महाश्रम शर्माले एसईईको प्रश्नपत्र सुधार गर्न र समानस्तरको प्रश्नपत्र तयार गरी परीक्षा सञ्चालन गर्ने उद्देश्यले यसखाले परीक्षा सञ्चालन गरिएको जानकारी दिए ।
“यस परीक्षाका आधारमा कक्षाकोठामा अध्यापनमा सुधार र परिवर्तन ल्याउनुपर्छ” उनले भने, “यसैका आधारमा आगामी वर्षबाट एसईईको प्रश्नपत्रमा सुधार गरिनेछ ।”
स्तरीकृत परीक्षाका लागि ३० हजार शिक्षकलाई सहभागी गराएर प्रश्नपत्र तयार गरिएको बोर्डले जानकारी दिएको छ । शिक्षकबाट अनलाइन र भौतिक उपस्थितिका आधारमा प्रश्न सङ्कलन गरिएको थियो ।
बोर्डका अध्यक्ष डा. शर्माले कक्षा ८ को पनि नमुना प्रश्न बनाइएको बताए । उनले देशका ७५३ पालिकाका शिक्षा अधिकारीलाई तालिम दिने र तिनै अधिकारीमार्फत शिक्षकलाई तालिम दिने योजना तयार गरिरहेको बताए ।
