पुरानो पाठ्यक्रमअनुसार कक्षा १० मा अध्ययन गर्ने जो कोही विद्यार्थीले अङ्ग्रेजी भाषाको पाठ्यक्रममा एउटा पाठ पढ्नुपर्छ, त्यो हो ‘अ पेन फ्रेण्ड टु गम्भीर मान’ ।
यो पाठ पढ्ने विश्वनिकेतन माविका छात्रछात्रा मात्र नभई देशभरिका विद्यार्थीले चिनिएको नाम हो– ‘गभ्मीरमान मास्के’ । यो पाठ वरिष्ठ शिक्षाविद् गम्भीरमानलाई सम्झँदै त्रिभुवन विश्वविद्यालयका उपकुलपति केदारभक्त माथेमाले लेख्नुभएको पाठ हो । यो नै पाठका नायक नेपाली शिक्षा क्षेत्रका अग्रणी व्यक्तित्व वरिष्ठ शिक्षाविद् स्व मास्केद्वारा लिखित ‘न्हि–म्हगसय् वइम्ह’ नामक पुस्तक तीन वटा भाषामा अनुवाद भएको छ ।
नेपाल भाषामा लिखित ‘न्हि–म्हगसय् वइम्ह’ पुस्तक नेपाली भाषामा ‘दिवा स्वप्नमा आउने’ तथा ‘दि लिन्जेरिङ्ग इमेज अफ माई डेड्रिम’ आज एक समारोहमा विश्वनिकेतन माविमा यहाँ विमोचन भयो । स्व मास्केले आफ्नी श्रीमती गङ्गाको सम्झनामा यो आत्मवृत्तान्त पुस्तक लेख्नुभएको थियो ।
सो पुस्तक भाषाविद् तथा शिक्षाविद् तेजरत्न कंशाकारले नेपाली भाषाबाट अङ्ग्रेजी भाषामा अनुवाद गर्नुभएको हो । कूल ३५ वर्ष शिक्षण सेवामा बिताउनुभएका स्व मास्केले २८ वर्ष प्रधानाध्यापक भई सेवा गर्नुभएको थियो । नेपाल भाषाका अतिरिक्त उहाँ नेपाली, अङ्ग्रेजी, हिन्दी भाषाका ज्ञाता हुनुहुन्थ्यो ।
सो अवसरमा भाषाविद् तेजरत्न कंशाकारले नेपालको शिक्षा क्षेत्रमा स्व मास्केले दिनुभएको योगदान अतुलनीय रहेको बताउँदै दशकौँसम्म विद्यार्थीमाझ ‘गम्भीरमान सर’को नामबाट पुकारिएको जानकारी दिनुभयो ।
पूर्वप्रधानाध्यापक सत्यनारायण राजभण्डारीले स्व गम्भीरमान मास्केले विश्वनिकेतन माविलाई यो अवस्थामा पु¥याउन महत्वपूर्ण भूमिका निर्वाह गर्नुभएको स्मरण गर्दै विश्व निकेतन माविलाई उच्च गुणस्तरीय शिक्षा दिन शिक्षाविद् मास्केको अथक योगदान बिर्सन नसकिने बताउनुभयो ।
पूर्वराजदूत एवं त्रिभुवन विश्वविद्यालयका पूर्वउपकुलपति केदारभक्त माथेमाले शिक्षाविद् मास्केलाई सम्झेर आफूले कक्षा १० मा रहेको अङ्ग्रेजी पाठ्यपुस्तकमा ‘अ पेन फ्रेण्ड टु गम्भीरमान’ शीर्षकको पाठ लेखेको जानकारी दिनुभयो । विश्व निकेतनको विद्यालय व्यवस्थापन समितिका अध्यक्ष गोपाल श्रेष्ठ तथा प्रधानाध्यापक हेरम्बराज कँडेलले विश्व निकेतन मावि सरकारी विद्यालय भएर पनि उच्च गुणस्तरीय शिक्षा प्रदान गर्दै आएको जानकारी दिनुभयो ।
स्थापनाकालदेखि नै उच्च गुणस्तरीय शिक्षा प्रदान गर्दै आएको विश्व निकेतन माविको उत्पादनका रुपमा केदारभक्त माथेमा, डा रामशरण महत, विद्यासुन्दर शाक्य, स्व कलाकार श्रीकृष्ण श्रेष्ठ, नलिना चित्रकार र डा अरुण सायमी हुन् ।
