आफ्नो कार्यकालमा विद्यालयको शैक्षिक व्यवस्थापन उत्कृष्ट गरेको भन्दै रोम्बस सेकेण्डरी स्कुलले भक्तपुरका तीन जना प्रधानाध्यापकलाई ‘भक्तपुर शैक्षिक रोशन’ पदक प्रदान गरेको छ ।
भक्तपुरको जिल्लाकै उत्कृष्ट विद्यालयका रूपमा आफ्नो विद्यालयलाई चिनाउन सफल तीन जनालाई आफ्नो छैटौं वार्षिकोत्सवको उपलक्ष्यमा विद्यालयले सम्मान गरेको हो ।
सम्मानित हुनेहरूमा वागीश्वरी माविका पूर्व प्रधानाध्यापक मोहनप्रसाद प्रजापति, बासु माविका पूर्व प्रधानाध्यापक बालमुकुन्द बासुकला र जोरपाटी मावि तथा देवी माविका पूर्व प्रधानाध्यापक शेरबहादुर ङाखुसी रहेका छन् ।
रोम्बस सेकेण्डरी स्कुलको छैटौं वार्षिक साधारणसभा, पुरस्कार वितरण तथा सांस्कृतिक कार्यक्रममा भक्तपुर नगरपालिकाका प्रमुख सुनिल प्रजापतिले पदक, दोसल्ला र प्रमाणपत्रले सम्मान गरेका छन् ।
कार्यक्रममा प्रमुख प्रजापतिले विद्यार्थीहरूलाई सभ्य, सुसंस्कृत र असल नागरिक बन्न अभिप्रेरित गर्दै व्यक्ति समृद्धि बन्ने होइन देशलाई समृद्धितर्पm लग्न सबैले ध्यान दिनुपर्नेमा जोड दिए ।
उनले शिक्षाले व्यक्ति, समाज र देशलाई अगाडि बढाउन महत्वपूर्ण भूमिका निर्वाह गर्ने भएको र उच्च शिक्षामा गरिब जनताको पहुँच नभएको बताउँदै शिक्षामा जनताको पहुँच अभिवृद्धि गर्न भनपाले सस्तोमा गुणस्तरीय शिक्षा दिने कलेजहरू सञ्चालन गरी भक्तपुरलाई शैक्षिक गन्तव्यस्थल बनाउन लागिरहेको बताए ।
कार्यक्रममा स्कूलका प्रिन्सिपल राजेन्द्र कोजूले रोम्बस स्कूल चरित्रवान, नैतिकवान र विद्यार्थी उत्पादन गर्ने अभियानमा रहेको बताउनुहुँदै विद्यालयले पठनपाठनका अतिरिक्त खेलकुद र साहित्यलाई विशेष जोड दिँदै आएको बताए ।
सोही अवसरमा ईसिडी विशेषज्ञ सानु अमात्यले स्कूलको गतिविधि बालमैत्री भएको बताउँदै २१ औं शताब्दीमा विद्यार्थीहरूलाई युग सुहाउँदो शिक्षा दिन विद्यालय अग्रसर हुनुपर्ने र बालबालिकाको शारीरिक र मानसिक विकास सँगै असल संस्कार दिनुपर्नेमा जोड दिइन् ।
विद्यालयले सोही अवसरमा रोम्बस शुभश्री पदक २०७६ प्रदान गरेको छ । सो सम्मानबाट कमल ढुंगाना, बबिता गुरूङ र लक्ष्मीकुमार भैनात्व सम्मानित भएका छन् ।
कार्यक्रममा वर्ष अभिभावक पदक २०७६ उमेश खड्कालाई प्रदान गरिएको छ । त्यस्तै सक्रिय अभिभावक पदक २०७६ बाट राजेश श्रेष्ठ र बिन्दा थापा सम्मानित भएका छन् ।
सोही अवसरमा वर्ष शिक्षक पदक २०७६ बाट शिक्षक उमेश सुवाल सम्मानित भएका छन् । कार्यक्रममा रोम्बस निरन्तर सेवा पदक २०७६ बाट शिक्षकहरू नवीन दुवाल, रोशनी सुवाल, अर्चना मानन्धर, सूर्यप्रसाद तिमल्सिना र जनकराज कार्की सम्मानित भएका छन् ।
कार्यक्रममा चित्रबहादुर पाण्डे गौरब पुरस्कार २०७६ बाट विपिन उप्रेती सम्मानित भएका छन् ।
