![वैदेशिक अध्ययनलाई थप व्यवस्थित बनाइने](https://media.edusanjal.com/__sized__/news_headers/photo_2024-09-05_16-55-04-crop-c0-5__0-5-300x180-70.jpg)
काठमाडौँ, १२ फागुन (रासस) : शिक्षक पदमा नियुक्ति दिने भन्दै विद्यालय व्यवस्थापन समितिका सदस्यले एक युवकसँग घुस लिएको पाइएको छ । अख्तियार दुरुपयोग अनुसन्धान आयोगले पछिल्लो पटक शिक्षकमा नियुक्ति गरिदिने भन्दै घुस लिएको अभियोगमा विद्यालय व्यवस्थापन समितिका सदस्यलाई पक्राउ गरेको छ ।
उक्त अभियोगमा कपिलवस्तु यशोधरा गाउँपालिका–३ कृष्ण धार्मिक माविका विद्यालय व्यवस्थापन समितिका सदस्य विजयनाथ चोवेलाई पक्राउ गरेको छ । विद्यालयले विज्ञापन गरेको अङ्ग्रेजी विषयको माध्यमिक विद्यालय तहको अनुदान शिक्षक दरबन्दीमा शिक्षक नियुक्ति गरिदिने भन्दै चोवेलाई रु एक लाख घुस लिँदै गरेको अवस्थामा आयोगको एक टोलीले शनिबार पक्राउ गरेको हो ।
प्रवक्ता रामेश्वर दङ्गालका अनुसार आयोगले कपिलवस्तु नपा–१ को एक होटलबाट चोवेलाई शनिबार पक्राउ गरेको हो । यस्तै सप्तरीको साबिक खोक्सर प्रवाहा गाविसका तत्कालीन गाविस सचिव कृष्णबहादुर दाहाल समेतले सरकारी रकम हिनामिना गरेको अभियोगमा विशेष अदालतमा आज मुद्दा दायर गरेको छ ।
तत्कालीन गाविस सचिव दाहालले गाविसका लागि निकासा भएको सरकारी अनुदान रकमको स्रेस्ता बरबुझारथ, लेखापरीक्षणसमेत नगरी रु पाँच लाख ३३ हजार ८०० बराबरको हिनामिना गरेको पाइएको आयोगले जनाएको छ ।
यस्तै आयोगले नवलपरासीको पाल्हिनन्दन गाउँपालिकाका बाइसीदेवी प्राथमिक विद्यालयमा अध्यापन अनुमतिपत्र नभएका व्यक्तिलाई परीक्षामा सामेल गरेको भन्ने उजुरीका आधारमा शिक्षक वाल्मीकि गुप्ताविरुद्ध विशेष अदालतमा मुद्दा दायर गरेको छ । अस्थायी अध्यापन अनुमतिपत्रमा अनधिकृत र गैरकानूनी तवरले म्याद उल्लेख भएको भाग मेटाई झुट्टा विवरण पेश गरेको पाइएको आयोगका प्रवक्ता रामेश्वर दङ्गालले जानकारी दिनुभयो ।