स्यानिटाइजर
साबुन पानीले हात धुने
बन्दाबन्दीको बेलामा कक्षा (२ र ३) का साना नानीहरुका लागि घरमै बसी सिक्नकालागि तयार गरिएको नमुना स्वाध्यायन सामग्री
पाठः कोरोना भाइरस |
चित्र हेर्दै तिजको लयमा गाउनुहोस् ।
हेर्नुस् न आमा, जताततै कोरोना भाइरस आएछ ।
काम् धन्दा रोक्दै, संसारभरी महामारी ल्याएछ।
रोगबाट जोगिनलाई, मुखमा मास्क लगाऔँ ।
ओखती छैन, आफै बचौँ, कोरोनालाई भगाऔँ ।
|
|
|
साबुनपानीले मिचिमिची हात धुने बानी गरौँ ।
साबुनपानी नभएमा स्यानिटाइजर प्रयोग गरौँ ।
रोग सर्छ, बच्नु पर्छ, कसैलाई नछोऔँ ।
दुई मिटरको दूरीमा छुट्टाछुट्टै बस्ने गरौँ ।
हाच्छ्युँ-खोकी आएमा, मुख छोप्ने बानी गरौँ ।
आफ्नो रुमाल आफै बोकौँ, अरुको भर नपरौँ ।
महामारीका बेलामा घरमै बसी रमाऔँ ।
आफ्नै घरमा आमालाई काममा सघाऔँ ।
क्रियाकलाप
- घरमा दाजुभाइ दिदी बहिनीसँग कोरोना भाइरसबाट कसरी जोगिन सकिन्छ छलफल गर्नुहोस् ।
- माटो मुछेर सानो डल्ला बनाउनुहोस् । यसरी बनाएको डल्लामा मैदा पिठो घस्नुहोस् । माथिको चित्रमा झैँ ठाउँठाउँमा रातो माटो दलेर कोरोना भाइसरसको आकृति बनाउनुहोस् ।
- बाबुलाई घडी हेर्न लगाएर २० सेकेण्डसम्म साबुन पानीले मिचीमिची हात धुनुहोस् ।
- आफूसँग भएको मास्क दाजुभाइ दिदी बहिनी सबैले एकैसाथ लगाएर देखाउनुहोस् । मास्क लगाउने तरिका आफ्नो अभिभावकसँग सोध्नुहोस् ।
- एक मान्छे र अर्को मान्छे बीचको दूरी २ मीटर हुने गरी एक आपसमा बसेर देखाउनुहोस् ।
- धेरै दिन घर बस्दा तपाईँ के काम गर्नु हुन्छ ? परिवारमा छलफल गर्नुहोस् ।
मूल्याङ्कन
जोडा मिलाउनु होस् ।
तलका प्रश्नहरुको जवाफ दिनुहोस् ।
- कोरोना भाइरसले संसारभर के ल्यायो ?
- खोकी लाग्दा र हाच्छ्युँ आउँदा के गर्नुपर्छ ?
- हात सफा राख्न के के गर्नु पर्छ ?
- कोरोना भाइरसको महामारीका वेलामा कहाँ जानु पर्छ ?
- कोरोना भाइरसको ओखती के हो ?
थप क्रियाकलाप
अभिभावकलाई अनुरोधः
प्रिय अभिभावकज्यू, अहिले हाम्रो देशमा कोरोना भाइरसको महामारीले गर्दा सबै शिक्षण संस्था बन्द छन् । यस्तो बेलामा आफ्ना बालबालिकालाई घरमै सिक्ने वातावरण बनाइदिनुहोस्। कोरोना भाइरसबाट कसरी बच्ने भन्ने ज्ञान र सिप सिकाउनका लागि यो नमुना पाठ तयार गरिएको हो । बालबालिकालाई झर्को नमानिकन सिकाउनुहोस् । कोरोना भाइरसको प्रभावबाट व्यक्तिगतरुपमा कसरी जोगिन सकिन्छ भन्ने कुरा भिडियो वा अनलाइन सामग्रीबाट पनि सिकाउनुहोस् । आफूले नजानेका कुरा विद्यालयका शिक्षकलाई फोन गरेर सोधेर पनि सिकाउने व्यवस्था मिलाउनुहोस् ।
(विशेष शिक्षामा विद्यावारिधि साेध गरेका लेखक शिक्षा सेवाका उपसचिव हुन् ।)
