मालिका गाउँपालिका–७ बिममा सञ्चालित किसानी प्राविधिक शिक्षालयको ‘किसानी सञ्जीवनी अक्षयकोष’मा रु ६६ लाखभन्दा बढी सहयोग जुटेको छ ।
सहयोग संकलनका लागि सञ्चालित अभियानमार्फत एक महिनामा उक्त रकम जुटेको हो ।
असोज अन्तिम हप्तादेखि सुरु गरिएको अक्षयकोषमा सहयोग सङ्कलन अभियानमार्फत हालसम्म रु ६६ लाख ५१ हजार सङ्कलन भएको विद्यालयका प्रधानाध्यापक जङ्गबहादुर गर्बुजाले बताए ।
तिहार अवसरमा मालिका गाउँपालिका–७ को विभिन्न टोलमा खेलिएको देउसीभैलो सहित नेपालमा रु ३३ लाख ९२ हजार सङ्कलन भएको थियो । अन्य रकम स्वदेश तथा विदेशमा रहेका बिमवासीले जुटाएको प्रधानाध्यापक गर्बुजाले जानकारी दिए ।
सो विद्यालयको बाली तथा पशु विज्ञान विषयको पठनपाठन हुने शिक्षालयमा अध्ययरत विद्यार्थीलाई छात्रवृत्ति प्रदान गर्ने उद्देश्यले सो कोषस्थापना गरिएको छ ।
प्राविधिक शिक्षा पढ्न इच्छुक रहेको तर आर्थिक कारणले पढाइबाट वञ्चित हुनुपरेको विद्यार्थीलाई सहयोग गर्ने मुख्य लक्ष्य राखेर अक्षयकोष स्थापना गरिएको विद्यालय व्यवस्थापन समितिका सदस्य टुकमान जुग्जालीले बताए ।
कोषमा स्वेच्छिक रूपमा आर्थिक सहयोग प्रदान गर्न देश विदेशमा रहेका बिमवासी, विद्यालयका अभिभावक, पूर्वविद्यार्थी तथा सम्पूर्ण समाजसेवीलाई विद्यालयले आग्रह गरेको छ ।
विसं २०६८ मा सुरु भएको प्राविधिक शिक्षालयमा हाल तीनवर्षे पशु, बाली विज्ञान र १८ महिने जेटिए कक्षा सञ्चालन भइरहेको छ ।
शिक्षालयमा हाल म्याग्दीसहित देशका विभिन्न जिल्लाका १५० जना विद्यार्थी अध्ययनरत छन् ।
