कोरोनाको कारण लामो समय विद्यालय जान नपाएका विद्यार्थी विद्यालय जान पाएपछि मख्ख परेका छन् । लामो समयसम्म घरमै बस्न बाध्य पाल्पाका विद्यार्थी झोला बोकेर स्कुल पोशाकमा विद्यालय जान पाउँदा धेरै खुसी देखिएका हुन् ।
विद्यालयमा आफैं गएर पढ्न पाउँदा धेरै छिटो बुझन सकिने रामपुर आवासीय अङ्ग्रेजी बोर्डिङ स्कुल कक्षा १० मा अध्ययनरत सुस्मा सिग्देल बताइन् । “विद्यालय बन्द हुँदा घरमा बसेर अनलाइन कक्षा पनि पढियो, अनलाइन कक्षाको तुलनामा भौतिकरुपमा विद्यालयमा नै उपस्थित भएर पढ्दा नै छिटो बुझ्न सकिने, धेरै कुरा सिकिने, विद्यालय जान पाउँदा रमाइलो लागेको छ ।” उनी भन्छिन्, “अब कहिल्यै यसरी लामो समय विद्यालय बन्द भएर घरमा बस्नु नपरोस् ।”
बिहान १० बजेदेखि दिउँसो २ बजेसम्म खाजा खाने समय कटाएर नियमित पढाउन थालिएको रामतुलसी माविका प्रधानाध्यापक बालकृष्ण लम्सालले जानकारी िदए । “खाजा खाने समयलाई शिक्षण कार्यमा सदुपयोग गरी दिउँसो २ बजेसम्म नियमित कक्षा चलाइ रहेका छौं, विद्यार्थी विद्यालयमा आउन पाउँदा असाध्यै खुशी भएका छन्”, उनले भने ।
केही पालिकाका विद्यालयले भने दसैँअघि परीक्षा सक्ने गरी प्रथम त्रैमासिक परीक्षा सञ्चालन गरिरहेका छन् । कोरोनाको कहर कम हुँदै गएपछि स्वास्थ्य सुरक्षाका मापदण्ड अपनाएर गत भदौ २७ गतेदेखि नै रामपुर नगरपालिकाका सबै विद्यालयमा नियमित पठनपाठन भइरहेको नगर शिक्षा अधिकृत विकल काफ्ले बताए ।
“नगरपालिकाभित्रका सबै विद्यालयमा धमाधम पढाई भइरहेको छ, केही विद्यालयमा प्रथम त्रैमासिक परीक्षा पनि सञ्चालन भएका छन्” उनले भने, “नियमितरुपमा विद्यालय खुल्न थालेपछि विद्यार्थी पनि उत्सुक छन् ।”
धेरै समयपछि पढाइ भए तापनि शिक्षण सिकाइ कार्यप्रति विद्यार्थी उत्सुक रहेको पूर्वखोला गाउँपालिका–३ अर्खडाँडास्थित जनउज्ज्वल आधारभूत विद्यालयका शिक्षक डिल्लीराज पङ्गेनीले बताए ।
माथागढी गाउँपालिकाका सबै विद्यालयमा अहिले धमाधम पठनपाठन चलिरहेको छ । स्वास्थ्य सुरक्षा अपनाउँदै गत भदौ २७ देखि नै विद्यालय सञ्चालन भइरहेको गाउँपालिकाका अध्यक्ष सन्तोष थापा मगरले बताए ।
यस्तै रम्भा गाउँपालिकाले कोरोनाको कहर कम हुन थालेपछि सबै विद्यालयमा पठनपाठन सञ्चालन कार्य अगाडि बढाएको छ । यहाँ विद्यालय सुरु गर्दाको बखत धेरै विद्यार्थी भएका विद्यालयले केही दिन आलोपालो गरी कक्षा चलाए । अहिले सबै विद्यालयमा नियमितरुपमा पठनपाठन कार्य चलिरहेको रम्भा गाउँपालिकाका अध्यक्ष विष्णुप्रसाद भण्डारीले जानकारी दिए ।
पाल्पाका सबै पालिकामा स्वास्थ्य सुरक्षाका मापदण्ड अपनाएर सावधानीपूर्वक पठनपाठन कार्य चलिरहेको शिक्षा विकास समन्वय तथा एकाइ पाल्पाका प्रमुख रमेशराज पौडेलले बताए । केही पालिकाका विद्यालयले बन्दाबन्दीका समयमा इन्टरनेटका माध्यमबाट कक्षा सञ्चालन गरेका थिए । इन्टरनेटको पहुँच नभएका विद्यार्थीले बन्दाबन्दीमा घरमै खेलेर समय बिताउन बाध्य थिए ।
अहिले भने विद्यालय खुलेपछि नियमित स्कुल पोशाकमा कापी कलम बोकेर विद्यालय जाने गरेको अभिभावक सुस्मा भट्टराईले बताइन् । मास्क, स्यानिटाइजरको अनिवार्य प्रयोग गरेर विद्यार्थी अनिवार्यरुपमा विद्यालय जान थालेका छन् ।
