आवश्यक कक्षा कोठा नहुँदा पठनपाठन प्रभावित भएको छ । कक्षाकोठा अभावमा बालबालिकाको पठनपाठन प्रभावित बनेको हो । लागत अनुमान नगरी विद्यालय भवनको मर्मत संभारका लागि नगरपालिकाले विनियोजन गरेको बजेटबाट भवन भत्काएर निर्माण सुरु गर्दा विद्यालय भवन निर्माण कार्य अलपत्र परेको छ । भएको कच्ची भवन भत्काएर नयाँ बनाउन लाग्दा बजेट अभाव भई समस्या उत्पन्न भएको हो ।
जनप्रतिनिधि परिवर्तनपछि अघिल्लो आर्थिक वर्षमा सुरुआत भएका योजनामा यस वर्ष बजेट नछुट्टिँदा पाँचथरको एक विद्यालयको भवन निर्माण अलपत्र बने संगै विद्यार्थीको पठनपाठन प्रभावित भएको अभिभावकहरू बताउँछन् ।
एक बालविकास केन्द्रका सहयोगी कार्यकर्ता र दुई शिक्षक रहेको विद्यालयसँग अहिले तीन कोठे भवन छ । उक्त भवनमा कार्यालयसहित पाँच ओटा कक्षा सञ्चालन गर्नुपर्दा शिक्षण सिकाइ प्रभावित भएको प्रधानाध्यापक चित्रकला घिमिरेले बताइन् ।विद्यालयले एउटा कोठामा कार्यालय, पूर्वप्राथमिक कक्षा र कक्षा १, दोस्रो कोठामा कक्षा २ र ३ तथा तेस्रो कोठामा कक्षा ४ र ५ सञ्चालन गर्दै आएको विद्यालयले जानकारी दियो ।
फिदिम नगरपालिका–११ फलाँटेस्थित पाथीभरा आधारभूत विद्यालयको तीनकोठे कच्ची भवन जीर्ण बनेपछि गत वर्ष भत्काइयो । आव २०७८–७९ को बजेटमार्फत फिदिम नगरपालिकाले नयाँ भवन निर्माणका लागि रकमको प्रबन्ध गरेपछि नयाँ भवन निर्माण सुरु भयो ।
भवन मर्मतमा बजेट छुट्टिए पनि प्राविधिक लागत अनुमान परिवर्तन गरी दुई कोठे भवन निर्माण थालियो । गत आवको बजेटबाट दुई कोठे भवन निर्माणका लागि जग निर्माण र छत ढलानको कार्य पनि सम्पन्न भयो । तर भवनमा पर्खाल लगाउने, झ्यालढोका राख्ने, रङरोगन गर्न बजेट पर्याप्त भएन ।
‘विद्यालयको कोषमा रहेको रु ६० हजार रकमसमेत निकासा गरी हालसम्मको निर्माण कार्य गरियो’, विद्यालयका प्रधानाध्यापक घिमिरेले भनिन्,‘तर यस वर्ष बजेट नछुट्टिँदा हामी समस्यामा परेका छौँ ।’
प्राविधिक लागत अनुमानअनुसार जग निर्माण र छत ढलानको कार्य उक्त बजेटले सम्पन्न हुनुपर्ने थियो । तर विद्यालयसम्म मोटर बाटो आई नपुगेकाले निर्माण सामग्री मानिसले बोकेर ढुवानी गर्नुपर्ने भएपछि लागत बढ्यो । ‘रड, सिमेन्ट र बालुवाको करिब रु तीन लाख ऋण छ’, प्रधानाध्यापक घिमिरेले भनिन्,‘एकातिर भवन निर्माण अलपत्र छ, अर्कातिर ऋण लागेको छ ।’
यस विषयमा फिदिम नगरपालिकामा निवेदन दिइनुका साथै जनप्रतिनिधिलाई पटकपटक आग्रह गरेको र प्रधानाध्यापकको बैठकमा आफूले कुरा राख्दै आएको भए पनि बजेटको प्रबन्ध नहुँदा समस्या भएको घिमिरेले बताइन् ।
नगरपालिकाबाट सुरुआत भएको योजना भएकाले नगरबाटै सम्पन्न हुनुपर्ने आफूहरुले बुझे पनि भवन निर्माणलाई पूर्णता दिन बजेट नछुट्टिँदा समस्या भएको फिदिम–११ का वडाध्यक्ष राजेन्द्रकुमार थापाले वताए। ‘नगरप्रमुख, उपप्रमुखलाई यहाँ आएर समस्या हेरिदिनुस् भनेर आग्रह गरे पनि उहाँहरु आउनुभएको छैन”, थापाले भने, ‘वडासँग भवन निर्माण पूरा गर्ने बजेट छैन् ।’
भवन निर्माणको योजना अलपत्र हुँदा विद्यार्थीको पठनपाठनमा असर परेको उनको भनाइ छ । कक्षा ५ सम्म पढाइ हुने यस विद्यालयमा अहिले ३५ जना विद्यार्थी छन् ।
