पाल्पाको तिनाउ गाउँपालिका–४, झुम्सास्थित तिलोत्तमा माध्यमिक विद्यालयले सञ्चालन गरेको प्री डिप्लोमा अटोमोबाइल पढ्ने छात्राको संख्या बार्षिक रुपमा बढ्दै गएको पाइएको छ ।
विद्यालयले विसं २०७६ मा १८ महिने अटोमोबाइल तालिम सञ्चालनमा ल्याएको थियो । अटोमोबाइल सञ्चालनको पहिलो वर्ष २३ जना छात्र मात्र भर्ना भएका थिए । दोस्रो वर्ष २२ जना विद्यार्थी भर्ना भएकामा छ जना छात्रा थिए ।
अटोमोबाइल पढन प्रति विद्यार्थी ४० हजार रुपियाँ शिक्षण शुल्क तिर्नु पर्छ । विद्यालयले छात्राहरुलाई आकर्षित गर्न भर्नाबाहेकको शुल्क पूर्णरुपमा छुट गरेपछि छात्राको संख्यामा वृद्धि भएको हो ।
विद्यालयका प्रधानाध्यापक झपिन्द्र ज्ञवालीका अनुसार छात्रा, जेहन्दार तथा सीटीभीटीले पठाएको एक जनालाई शिक्षण शुल्कमा पूर्ण छुट गरिएको छ। “यो विषयको अध्ययनले कोही पनि बेरोजगार हुनुपर्ने स्थिति हुँदैन, सिप भएपछि काम जहाँ पनि पाइन्छ,” उनले भने ।
आर्थिक रुपमा कमजोर विपन्न समुदायका बालबालिकालाई शिक्षण शुल्क तिर्न बाध्य नपारिएको र पैसाकै कारण अध्ययन गर्नबाट बाहिरिनुपर्ने बाध्यता विद्यार्थीहरुमा नहुने प्रधानाध्यापक ज्ञवालीले बताए ।
एसइईमा ‘इ’ ग्रेड प्राप्ति गर्ने बालबालिका राम्रो विषय अध्ययनबाट वञ्चित छन् । ‘इ’ ग्रेड प्राप्त गर्नेहरुलाई दक्ष जनशक्ति उत्पादनका निम्ति अटोमोबाइल विषय सञ्चालन गरिएको प्रधानाध्यापक ज्ञवालीले बताए । “विद्यालयले विद्यार्थीहरुले अध्ययन गर्न पाउने अधिकारको सुनिश्चित गरिएको छ । अन्यत्रको विद्यालयमा शिक्षण शुल्क अनिवार्य गरिएको भए पनि यहाँ पैसा नभएका बालबालिकालाई अध्ययन गर्न पाउने गरी व्यवस्था गरिएको हो,” प्रधानाध्यापक ज्ञवालीले भने, “हामीले विद्यालय सञ्चालन गर्दा महायज्ञ गरी सङ्कलन गरिएको पैसाबाट शिक्षकलाई तलब दिन्छौं ।”
रोजगार पाउन सजिलो र अटोमोबाइलका क्षेत्रमा महिलाहरुको उपस्थिति बढाउन यो विषयको अध्ययन सुरु गरिएको विद्यार्थी अस्मिता दर्लामीले बताइन्।
शैक्षिक बेरोजगारी समस्या रहेकाले अटोमोबाइलको कोर्ष अध्ययनपछि रोजगारका अवसरहरु सिर्जना गर्न सहज हुने एलिना सर्वुजाले बताइन् ।
पाल्पाका खानीबाट चुनढुङ्गा बोकेर टिप्परको आवतजावत बढ्दो छ । टिप्पर आवतजावत हुँदा स्थानीय स्तरमा रोजगारीको सम्भावना रहेकाले अटोमोबाइलसम्बन्धी अध्ययन सञ्चालन गरिएको विद्यालय व्यवस्थापन समितिका अध्यक्ष टङ्क बस्यालले बताए । “शैक्षिक बेरोजगारीको समस्या स्थानीय तहबाट हल गर्न सीपमूलक व्यावसायिक तालिमको आवश्यक छ । तालिमबाट दक्ष जनशक्ति उत्पादन गरी जटिल काम गर्न नपरोस् भनी अटोमोबाइलका कक्षा सञ्चालन गरिएको हो,” वडाध्यक्ष प्रेमप्रसाद पाण्डेय भने, “आर्थिक अभाव रहे पनि स्थानीय बासिन्दाको सहयोगमा आवासीय सुविधा प्रदान गरिएको हो । पहिलो वर्ष स्थानीय बासिन्दा घर भाडामा लिई आवासीय सुविधा प्रदान गरिएकामा अहिले विद्यालयको भवन नै आवासका निम्ति प्रयागे गरिएको छ ।”
तिनाउ गाउँपालिकाका प्रवक्ता राजेश श्रेष्ठले गाउँपालिकाले प्राविधिक शिक्षा सञ्चालन गर्ने विद्यालयहरुलाई भौतिक संरचना निर्माणमा सहयोग गरेको बताए ।
भौतिक संरचनाको विकास गरी सुविधासम्पन्न कक्षाकोठामा अध्ययन अध्यापन गराउन सहयोग गरिएको श्रेष्ठले जानकारी दिए । पाल्पामा प्राविधिक शिक्षातर्फ कृषि, पशुपालन, सिभिल इन्जिनियरिङ, स्वास्थ्यसम्बन्धी अध्यापन हुँदै आएको छ ।
