परीक्षा नियन्त्रण कार्यालयले आगामी साता २०८० सालको माध्यमिक शिक्षा परीक्षा (एसइई)को नतिजा सार्वजनिक गर्ने भएको छ ।
राष्ट्रिय परीक्षा बोर्डका कक्षा १० का परीक्षा नियन्त्रक नन्दलाल पौडेलले नतिजामा त्रुटि नहोस् भन्नका लागि इन्ट्री रुजु भइरहेको जानकारी दिए । करिब डेढ सय कर्मचारीलाई इन्ट्री रुजुका लागि परिचालन गरिएको छ । शिक्षा सेवातर्फका अधिकृत स्तरसम्मका कर्मचारीलाई सो कार्यमा प्रयोग गरिएको छ ।
यसैबीच बोर्डले एसइईको ग्रेड सिट कक्षा १२ को जस्तै हुने निर्णय गरेको छ ।
प्रयोगात्मकलाई प्राक्टिकल नलेखी इन्टरनल उल्लेख गरिने भएको छ भने सैद्धान्तिक (थ्योरी) उल्लेख हुने छ ।
परीक्षा नियन्त्रक पौडेलका अनुसार सैद्धान्तिक र आन्तरिकको अलग अलग ग्रेडप्वाइन्ट र ग्रेड उल्लेख हुनेछ । त्यसपछि समग्रमा विषयगत ग्रेड हुनेछ । सबैभन्दा पुछारमा ग्रेड प्वाइन्ट एभरेज (जिपिए) उल्लेख हुनेछ ।
यसपटकबाट नयाँ जारी गरिएको लेटर ग्रेडिङ निर्देशिकाअनुसार मूल्याङ्कन हुनेछ । सोअनुसार ३५ प्रतिशत प्राप्त नगर्नेको नन ग्रेडेड उल्लेख हुनेछ । नन ग्रेडेडको व्यवस्था सैद्धान्तिक र आन्तरिक दुवैमा लागू हुने जनाएको छ ।
परीक्षा नियन्त्रक कार्यालयका सम्बद्ध पदाधिकारीहरुले ननग्रेडको व्यवस्थाले गर्दा यसपटक ‘अनुत्तीर्ण’ हुनेहरुको सङ्ख्या बढी हुनसक्ने अनुमान गरेका छन् । बढीमा दुई विषयसम्म ननग्रेड प्राप्त गरेका परीक्षार्थीका लागि आगामी साउनमा ग्रेडवृद्धिको परीक्षा सञ्चालन गरिने बताइएको छ । उनीहरुले तीन पटकसम्म पनि ननग्रेड प्राप्त गरिरहेमा त्यसपछिको परीक्षामा पूरा विषयको परीक्षा दिनुपर्ने हुन्छ ।
