रात पर्ने भएकाले सबै तयारी पूरा भइसक्दा पनि राष्ट्रिय परीक्षा बोर्डले २०८० सालको माध्यमिक शिक्षा परीक्षाको नतिजा आज सार्वजनिक गर्न चाहेन ।
नतिजा प्रकाशनका लागि आज विहान ‘डेमो’का लागि पदाधिकारी उपस्थित भएका थिए । पछि डेमोको समय अपराह्न १ बजेका लागि सारियो । पुनः अपराह्न २ बजेका लागि सारियो । परीक्षा नियन्त्रण कार्यालयले अपराह्न ३ बजेबाट डेमो सुरु गरेको थियो ।
डेमो सुरु गरेको कम्तीमा चार घण्टा नतिजा प्रकाशन गर्ने भनी निर्णय गर्न लाग्छ । सो निर्णय गरेको करिब दुई घण्टापछि मात्र वेबसाइटमा नतिजा उपलब्ध हुन्छ ।
परीक्षा नियन्त्रक नन्दलाल पौडेलले सबै तयारी पूरा भइसकेको बताउँदै भने, “डेमो ढिला गरी सुरु भएकाले नतिजा सार्वजनिक गर्न रात पर्ने भएको हुँदा विद्यार्थीलाई रातको समयमा तनाव दिनु उपयुक्त लागेन । त्यसैले भोलि बिहीबार विहान नतिजा सार्वजनिक गर्ने भएका छौँ ।” उनका अनुसार भोलि विहान ८ बजे बोर्ड बैठक बस्नेछ ।
उनले बाँकी प्रक्रिया आजै सकिएको र औपचारिक निर्णयका लागि भोलि बोर्ड बैठक बस्ने जानकारी दिए ।
