शिक्षा, विज्ञान तथा प्रविधिमन्त्री गिरिराजमणि पोखरेलले नेपाली भाषालाई कमजोर बनाउने गरी अङ्ग्रेजी भाषाको प्रयोगमा जोड दिन नहुने बताउनुभएको छ । विश्व निकेतन माध्यमिक विद्यालय काठमाडौँको ७४औँ वार्षिकोत्सव समारोहमा बोल्दै उनले दक्षिण एशियाको पुरानो भाषाका रुपमा रहेको नेपाली भाषालाई बलियो बनाउँदै अङ्ग्रेजी भाषाको प्रयोगमा जोड दिए ।
‘अङ्ग्रेजी मात्र होइन, चिनियाँलगायतका अन्य भाषाको सिकाइ र प्रयोग गर्दै जानुपर्छ’ उनले भने, ‘अङ्ग्रेजी भाषाको प्रयोग बढ्दै जाँदा नेपाली भाषा कमजोर बन्दै जाने सम्भावना बढेर गएको छ ।’
मन्त्री पोखरेलले शिक्षाले देशको समग्र विकासको खाका तयार पार्ने बताउँदै शिक्षा क्षेत्रको विकास बिना सरकारले अघि सारेको ‘समृद्ध नेपाल सुखी नेपाली’को नाराले सार्थकता पाउन नसक्ने बताए । उनले नयाँ–नयाँ प्रविधिको उपयोग गर्न नसके मुलुकले विकासमा फड्को मार्न नसक्ने औँल्याउँदै राज्यले प्रविधिमैत्री शिक्षामा जोड दिएको बताए।
मन्त्री पोखरेलले काठमाडौँ उपत्यकामा दश प्रतिशत सामुदायिक र ९० प्रतिशत निजी विद्यालय रहेको जानकारी दिँदै सामुदायिक विद्यालयले निजी विद्यालयलाई पछि पार्नुपर्ने बताए ।
‘अधिकांश सामुदायिक विद्यालय भौतिकरुपमा सबल छन्’ उनले भने ‘तर शैक्षिक गुणस्तर वृद्धि गर्न सकिरहेका छैनन् ।’ उनले गणित र विज्ञानको नजिता सन्तोषजनक आउन नसकेको बताउँदै सरकारले विज्ञान विषय सञ्चालनका लागि पर्याप्त बजेट विनियोजन गर्न लागेको बताए ।
विद्यालयका प्रधानाध्यापक हेरम्बराज कँडेलले विश्व निकेतनमा अध्ययन गरेका विद्यार्थी राष्ट्रियस्तरमा प्रतिष्ठित बन्न पुगेको बताए । उहाँले कम्प्युटरलाई अतिरिक्त विषयका रुपमा अध्ययन गराउनेमा यस विद्यालय नेपालकै पहिलो भएको दाबी समेत गरे ।
विद्यालय व्यवस्थापन समितिका अध्यक्ष गोपाल श्रेष्ठको अध्यक्षता एवम् शिक्षा विज्ञान तथा प्रविधि मन्त्री गिरिराजमणि पोखरेलको प्रमुख आतिथ्यतमा कार्यक्रम भएको हो । सो अवसरमा विद्यालयको स्तरोन्नतीका लागि महत्वपूर्ण भूमिका निर्वाह गर्ने शिक्षक तथा कर्मचारीहरुलाई सम्मानपत्र उपलब्ध गराइएको थियो ।
विद्यार्थीहरुले विज्ञान सम्वन्धि प्रस्तुती प्रस्तुत गरेका थिए । कार्यक्रममा सहभागीहरुले शिक्षक, विद्यार्थी र अभिभावकको त्रिकोणात्मक सम्वन्धले मात्रै विद्यालयको गुणात्मक विकास हुने बताएका थिए ।
सो अवसरमा विद्यालयका प्रधानाध्यापक कडेलले विद्यालयको प्रगति प्रतिवेदन प्रस्तुत गरेका थिए । विद्यार्थीहरुले आफ्नो प्रस्तुति गरेका थिए ।
