राष्ट्रिय परीक्षा बोर्ड परीक्षा नियन्त्रण कार्यालय कक्षा १० ले माध्यमिक शिक्षा परीक्षा (एसइई) पूरक (ग्रेडवृद्धि) को नतिजा असोज तेस्रो सातासम्म सार्वजनिक गर्ने भएको छ ।
बोर्डले कक्षा ११ को रजिस्ट्रेसन फारामलाई असर नपर्ने गरी नतिजा प्रकाशन गर्ने तयारी गरेको हो ।
बोर्डको वार्षिक कार्यतालिका अनुसार कक्षा ११ को रजिस्ट्रेसन फाराम भराउने समय असोज १५ देखि कात्तिक ३० भित्र (विलम्ब शुल्कसहित) को समय तोकिएको छ । त्यस अगाडि नै नतिजा प्रकाशन गर्ने योजनाका साथ काम भइरहेको बोर्डले जानकारी दिएकाे छ ।
बोर्डले अहिले धमाधम उत्तरपुस्तिका परीक्षण गरिरहेको जनाएको छ । विभिन्न स्थानका ३४ वटा परीक्षण केन्द्रबाट उत्तरपुस्तिका परीक्षण भइरहेको बोर्डले जानकारी दिएकाे छ । बोर्डका अनुसार प्रतिकूल मौसमका बावजुद परीक्षण सकिएका केही स्थानबाट प्राप्ताङ्क आइरहेको छ भने केही केन्द्रमा असर देखिएको छ । टाढा विकट क्षेत्रका कापी परीक्षण केन्द्रसम्म ल्याउन समस्या भइरहेको छ ।
२०८० सालको एसइईमा नियमित परीक्षार्थीको रूपमा सम्मिलित भई ग्रेड प्राप्त गर्न नसकेका र अनुपस्थित भएका सबै परीक्षार्थीले ग्रेडवृद्धि परीक्षामा सहभागी भएका छन् ।
दुई लाख नौ हजार ८०४ विद्यार्थी ग्रेडवृद्धि परीक्षामा सहभागी भएका थिए । एनजी आएका तथा अनुपस्थित रहेका दुई लाख ३४ हजारमध्ये करिब २३ हजार विद्यार्थीले उक्त परीक्षामा सहभागी भएनन् ।
ग्रडिङ निर्देशिका, २०६८ मा दुई विषयमा मात्रै एनजी आएका विद्यार्थीले मात्र ग्रेडबृद्धि परीक्षा दिन पाउने व्यवस्था थियो । निर्देशिकाको उक्त व्यवस्थालाई संशोधन गरी परीक्षामा अनुपस्थित तथा ननग्रेडेड सबैलाई परीक्षामा सामोल हुने अवसर दिइएको थियो ।
