शिक्षा, विज्ञान तथा प्रविधि मन्त्रालयले राष्ट्रिय शिक्षा दिवस, २०८० को अवसरमा प्रदान गरिने भनिएको नेपाल विद्याभूषण‘क’ ‘ख’ र ‘ग’ नेपाल छात्रा विद्यापदक ‘क’ ‘ख’ नेपाल प्रविधि विद्याभूषण तथा प्रमाणपत्र वितरणको कार्य स्थगित गरेको छ ।
मन्त्रालयले प्राविधिक कारण देखाउँदै उक्त कार्य स्थगित गरेको हो ।
मन्त्रिपरिषद्को गत जेठ ९ गतेको बैठकबाट प्रत्येक वर्षको असोज २ गते राष्ट्रिय शिक्षा दिवस मनाउने निर्णय गरेको र सो अवसरमा प्रदान गरिने नेपाल विद्याभूषण, नेपाल प्रविधि विद्याभूषण, नेपाल छात्रा विद्यापदक र छात्रा पुरस्कार प्राप्त गर्न योग्य व्यक्तिहरूबाट मिति साउन २१ गतेदेखि भदौ ३ गते सम्म आवेदन माग गरेको थियो ।
मन्त्रालयले सूचना जारी गर्दै आगामी असोज २ गते पदक तथा प्रमाणपत्र प्राप्त गर्नेहरूको नामावली प्रकाशन गरिने तथा पदक निर्माणको कार्य प्राविधिक कारणबाट तयार हुन नसक्ने भएकोले सो दिन पदक तथा प्रमाणपत्र वितरण नहुने उल्लेख गरेको छ । उक्त पदक तथा प्रमाण पत्र वितरणसम्बन्धी सूचना पछि प्रकाशित गरिने सूचनामा उल्लेख गरेको छ ।
