एसईई सञ्चालनको जिम्मेवारी प्रदेशलाई हस्तान्तरण गर्न मन्त्रिपरिषद्मा प्रस्ताव
राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई)को सबै अधिकार प्रदेशलाई हस्तान्तरण गर्ने प्रस्ताव अगाडि सारेको छ । प्रस्ताव मन्त्रिपरिषद्मा पुर्याइएको छ ।
शिक्षा पत्रकार सञ्जाल (इजोन)ले आज आयोजना गरेको अन्तरक्रियामा राष्ट्रिय परीक्षा बोर्डका अध्यक्ष डा. महाश्रम शर्माले प्रश्नपत्र तयारीदेखि नतिजा प्रकाशनसम्मको जिम्मेवारी प्रदेश शिक्षा निर्देशनालयलाई हस्तान्तरण गर्ने प्रस्ताव मन्त्रिपरिषद्मा लगिएको जानकारी दिए ।
“परीक्षा खारेज गर्नु हुँदैन” उनले भने, “परीक्षाको सबै अधिकार प्रदेशस्तरलाई दिइनेछ । पहिले देशभरिको नतिजा एकैपटक सार्वजनिक हुन्थ्यो । तर अब प्रस्ताव स्वीकृत भएपछि जुन प्रदेशले छिटो उत्तरपुस्तिका परीक्षणको काम सक्छ उसले पहिले नतिजा सार्वजनिक गर्न सक्नेछ । प्रदेशले आआफ्नै अनुकूलअनुसार नतिजा सार्वजनिक गर्नसक्नेछन् ।”
उनका अनुसार प्रदेशले नतिजा सार्वजनिक गरेपछि त्यसलाई बोर्डमा पठाउनुपर्ने हुन्छ र बोर्डले नतिजालाई प्रमाणीकरण गर्नेछ ।
बोर्डले यस वर्षको एसईई आगामी वैशाख ९ देखि २० गतेसम्म सञ्चालन गर्नेगरी परीक्षा तालिका सार्वजनिक गरिसकेको छ । फागुन र चैत महिनामा पठनपाठन हुँदा कोर्स पूरा हुनसक्ने सुझाव जिल्लाहरुबाट प्राप्त भएको बताउँदै तिनै सुझावका आधारमा वैशाखमा परीक्षा सञ्चालनको निर्णय गरिएको बताए ।
बोर्डका अध्यक्ष डा. शर्माले गत वर्षको प्रश्नपत्र सुरक्षित रहेको र त्यसलाई के गर्ने भन्ने बारेमा अझै निर्णय नभएको बताउँदै भने, “हामीसँग प्रश्नपत्रको बैँक छ । त्यही बैँक प्रदेशलाई हस्तान्तरण गर्नेछौँ । त्यसैले प्रश्नपत्र तयारीमा खासै समस्या रहँदैन ।”
उनले भौतिक उपस्थितिमा नै परीक्षा सञ्चालन गर्ने बताउँदै त्यो बेला कोरोना सङ्क्रमणको अवस्था बढेमा त्यहीअनुसार नयाँ विधि प्रयोग गर्नसकिने बताए ।
उनले कक्षा १२ को परीक्षा तालिका केही दिनमा सार्वजनिक गरिने जानकारी दिए ।