प्रधानाध्यापक संघ नेपालद्वारा तेस्रो राष्ट्रिय शिखर सम्मेलनमा पत्रकार, शिक्षाकर्मी, विद्यालय र स्थानीय सरकार सम्मानित
शिक्षा क्षेत्रका गतिविधि, उपलब्धि र चुनौतीहरूका विषयमा समाचार सम्प्रेषण गरेबापत पत्रकार दिनेश गौतम र मनिका झाले यस वर्षको ‘उत्कृष्ट शिक्षा पत्रकारिता पुरस्कार’ प्राप्त गरेका छन्।
प्रधानाध्यापक संघ नेपाल (प्यान) ले आज यहाँ आफ्नो तेस्रो राष्ट्रिय शिखर सम्मेलन–२०८३ मा उनीहरू प्रत्येकलाई २५ हजार रुपैयाँ नगद पुरस्कार प्रदान गरेको छ।
काठमाडौँ विश्वविद्यालयका पूर्वउपकुलपति स्वर्गीय प्रा. डा. सुरेशराज शर्मालाई पनि मरणोपरान्त राष्ट्रिय शिक्षा पुरस्कारबाट सम्मानित गरिएको छ।
संघले शिक्षा र गुणस्तरीय सिकाइमा पुर्याएको योगदानका लागि स्थानीय सरकार, विद्यालय र प्रधानाध्यापकहरूलाई पनि सम्मान गरेको छ। स्थानीय सरकार पुरस्कारअन्तर्गत संघले प्रत्येक प्रदेशका उत्कृष्ट महानगरपालिका तथा उपमहानगरपालिका, नगरपालिका र गाउँपालिकाहरूलाई सम्मान गरेको छ।
सातै प्रदेशका उत्कृष्ट सामुदायिक माध्यमिक तथा आधारभूत विद्यालयहरूलाई विद्यालय पुरस्कार प्रदान गरिएको छ भने उत्कृष्ट कार्यसम्पादन गर्ने विद्यालयका प्रधानाध्यापकहरूलाई प्रधानाध्यापक पुरस्कारबाट सम्मान गरिएको छ।
संघका मधेस प्रदेश संयोजक सञ्जयकुमार झाका अनुसार आधारभूत र माध्यमिक तहका १४ विद्यालय, १५ स्थानीय सरकार र १४ प्रधानाध्यापकहरूलाई सम्मान गरिएको छ।
सम्मानित हुने आधारभूत तहका उत्कृष्ट प्रधानाध्यापकहरूमा कोशी प्रदेशबाट राजेशप्रसाद यादव, मधेसबाट प्रेमकुमारी यादव, बागमतीबाट बिनिता रञ्जित, गण्डकीबाट विश्वमोहन पोखरेल, लुम्बिनीबाट गङ्गा शर्मा, कर्णालीबाट ज्ञानु गुरुङ र सुदूरपश्चिमबाट मानसिंह ऐर रहेका छन्।
प्रधानाध्यापक संघका अध्यक्ष सुदाम गौतमका अनुसार नोभेम्बर २० मा सुरु भएको सम्मेलन नोभेम्बर २२ सम्म चल्नेछ। सम्मेलनमा देशभरबाट एक हजार प्रतिनिधिहरू सहभागी छन्।
पूर्वराष्ट्रपति डा. रामवरण यादवले पुरस्कारहरू प्रदान गरेका थिए।