५० प्रतिशत इन्टर्नसिप भत्ता प्रदान गर्ने सहमति पछि विश्वविद्यालयको ताला खुल्यो

नेपाल संस्कृत विश्वविद्यालयमा ५० प्रतिशत इन्टर्नसिप भत्ता प्रदान गर्ने सहमतिसहित ५५ दिनपछि बन्द ताला खोलिएको छ ।

विश्वविद्यालयको अधिकृत स्तरको सुरुवाती तलवको ५० प्रतिशत बराबरको इन्टर्नसिप भत्ता प्रदान गर्ने सहमति पछि ताला खोलिएको हो ।

विश्वविद्यालयद्वारा आयुर्वेद अध्ययन संस्थानका डीन प्राडा चन्द्रप्रसाद भुसालको अध्यक्षतामा गठित वार्ता टोलीले यो सहमति गरेपछि ताला खोलिएको भुसालले जानकारी दिए ।।

गत असार ३ गते स्वतन्त्र विद्यार्थी युनियन केन्द्रीय आयुर्वेद विद्यापीठले विश्वविद्यालयको केन्द्रीय कार्यालयमा लगाएको ताला आज खोलिएको हो ।

स्वतन्त्र विद्यार्थी युनियन केन्द्रीय आयुर्वेद विद्यापीठले इन्टर्नसिप भत्ता बृद्धिको माग गर्दै विश्वविद्यालयको केन्द्रीय कार्यालयमा ताला लगाएको थियो । आफूहरुले राखेको माग पुरा भएपछि ताला खोलिएको स्वयुका अध्यक्ष हेमन्त वञ्जाडेले बताए ।

विश्वविद्यालयका उपकुलपति प्राडा यादवप्रकाश लामिछाने, शिक्षाध्यक्ष प्राडाभीम खतिवडा, कुलसचिव सहप्राध्यापक माधव अधिकारीसहित कर्मचारीको उपस्थितिमा ताला खोलिएको छ ।

विश्वविद्यालयको सेवा आयोगमा नेपाल विद्यार्थी संघले गत असार ९ गते लगाएको ताला भने अझै खुलेको छैन ।