संस्कृत शिक्षा अध्ययन गर्ने विद्यार्थीका लागि लायन्स क्लब अफ उज्यालो चौतारीले रु एक लाख एक हजार १११ को अक्षयकोषको स्थापना गरेको छ ।
पोखरा महानगरपालिका–१ भीमकालीपाटन स्थित संस्कृत माविमा अध्ययनरत विपन्न विद्यार्थीलाई लक्षित गर्दै क्लबले अक्षयकोष स्थापना गरेको हो ।
क्लबले आफ्नै सदस्यसंग रकम सङ्कलन गरेर अक्षयकोष स्थापना गरेको क्लबका अध्यक्ष अच्युत शर्माले जानकारी दिए । “अहिले बोर्डिङ स्कूल पढ्ने र उच्चशिक्षाका लागि विदेश जाने संस्कारको विकास भइरहेको छ, संस्कृत शिक्षाको महत्व उजागार हुन नसक्दा मौलिक संस्कार र संस्कृतिसमेत गुमिरहेको छ, यसको महत्वलाई उजागार गर्न संस्कृत शिक्षामा जोड दिन आवश्यक छ । उनले भने, यो सानो प्रयासले संस्कृत भाषा उत्थानमा सहयोग पुग्नेछ ।” अक्षयकोषको रकमको ब्याजले संस्कृत विद्यालयमा अध्ययनरत विपन्न विद्यार्थीको अध्ययन खर्चमा सहयोग पुग्ने उनले विश्वास व्यक्त गरे ।
विद्यालयमा हाल २०० विद्यार्थी अध्ययनरत छन् । सो विद्यालयमा कक्षा १ देखि ५ सम्म अङ्ग्रेजी माध्यममा पढाइ हुन्छ । कक्षा ६ देखि १२ सम्म २०० पूर्णाङ्कको संस्कृत विषय पढ्नुपर्ने हुन्छ भने आवासीय विद्यार्थीले ३०० पूर्णाङ्कको संस्कृत विषयको परीक्षा दिनुपर्ने सो विद्यालयका प्रधानध्यापक गोविन्द सिग्देलले जानकारी दिए ।
विद्यालयमा ४० दलित विद्यार्थी छन् । त्यसैगरी ४० प्रतिशत छात्राले संस्कृत विषय अध्ययन गरिरहेका छन् । अक्षयकोषको ब्याज रकमले विपन्न विद्यार्थीका लागि खाजा, स्टेशनरी र पोशाकका लागि खर्च गरिने जनाइएको छ । विद्यालयमा दुई सहयोगी र १८ शिक्षक–शिक्षिका रहेका छन् ।
तत्कालीन राणा प्रधानमन्त्री देवशम्शेरको निगरानीमा विसं १९५८ मा विन्ध्यवासिनी मन्दिर परिसरमा भाषा पाठशालाको रूपमा यस विद्यालयको स्थापना भएको हो । विसं २०१२ तिरबाट भीमकाली पाटनमा स्थानीय पराजुलीहरुले ८० रोपनी जग्गा उपलब्ध गराएपछि उक्त स्थानबाट संस्कृत विषयको पठनपाठन हुँदै आएको छ ।
उक्त विद्यालयको १० रोपनी जग्गा संस्कृत क्याम्पसले समेत भोगचलन गर्दै आएको छ । क्याम्पसले हाल शास्त्री ९स्नातक० पढाइ गराइरहेको छ भने यसै वर्षदेखि आचार्य ९स्नाकोत्तर० को पढाइका लागि भर्ना लिइराखेको प्रअ सिग्देलले जानकारी दिए ।
‘नेचर द फ्युचर’ शीर्षक अन्तर्गत क्लबले विभिन्न विद्यालयमा अध्ययनरत विपन्न विद्यार्थीको शैक्षिक व्यवस्थापन गदै आएको छ ।
जहाँ आवश्यकता त्यहाँ लायन भन्ने भनाइलाई आत्मसात गर्दै भविष्यका कर्णधारको खोजी गरेर अध्ययनमा सहयोग गर्दै आएको अध्यक्ष शर्माले जानकारी दिए ।
