वैदेशिक अध्ययन अनुमति शाखा (एनओसी) ले विद्युतीय प्रणालीको प्रयोग गरी आफैंले वैदेशिक अध्ययन स्वीकृति पत्र लिनसक्ने व्यवस्था आजदेखि सुरु गरेको छ । एनओसी कार्यालयमा आज आयोजित कार्यक्रममा शिक्षा, विज्ञान तथा प्रविधि मन्त्री अशोक कुमार राईले कपिलवस्तुको बुद्धभूमि नगरपालिकाका बिक्रम भट्टराईलाई प्रमाण पत्र प्रदान गर्दै यसको सुरुआत गरेका हुन् ।
भट्टराईलाई न्युजिल्याण्ड अध्ययनका लागि अनलाइन मार्फत् एनओसी प्रदान गर्दै अनलाइ प्रणालीको सुभारम्भ गरेको शाखाका अधिकृत जानुका गुरागाइले जानकारी दिइन् ।
शाखाले विद्युतीय प्रणालीको प्रयोग गरी वैदेशिक अध्ययन स्वीकृतिपत्र डाउनलोड गर्नसक्ने गरी सेवा प्रवाहलाई फेसलेस, पेपरलेस र क्यासलेस बनाइएको छ ।
कार्यक्रममा शिक्षा, विज्ञान तथा प्रविधिमन्त्री अशोककुमार राईले नो अब्जेक्सन सर्टिफिकेट चाहने विद्यार्थीले अभिभावक गुहार्नुनपर्ने र घरमै बसेर फाराम भर्न सक्ने बताए । उनले सर्टिफिकेट घरबाटै प्रिन्ट आउट गर्नसक्ने व्यवस्था हुनु प्रशंसनीय भएको बताए ।
उनका अनुसार विद्यार्थीले एनओसी फारामका लागि लाग्ने शुल्क पनि घरबाटै तिर्नसक्ने व्यवस्था गरिएको छ । मन्त्रालयका सचिव रामकृष्ण सुवेदीले फेसलेस, पेपरलेस र क्यासलेसको सुरुवात हुनु नेपालीका लागि खुसीको कुरा भएको बताए । उनले भने, ‘आजबाट हामीले फेसलेस, पेपरलेस र क्यासलेसको सुरुवात गरेका छौँ । अब अन्य तहमा पनि यस्तै व्यवस्था हुनुपर्छ ।
