नेपाल प्रहरी श्रीमती संघ र निजी तथा आवासीय विद्यालय अर्गनाइजेसन नेपाल (प्याब्सन) बिच बहालवाला प्रहरी कर्मचारीका परिवार, अमर प्रहरी परिवार तथा पूर्वप्रहरी परिवारका सन्ततीहरूलाई प्याब्सनमा आबद्ध सदस्य विद्यालयहरूमा छात्रवृत्ति तथा भर्ना शुःल्कसम्बन्धी सम्झौता भएको छ ।
सम्झौतापत्रमा प्याब्सनमा सदस्य विद्यालयहरूमा विद्यालय शिक्षा कक्षा १ देखि १२ सम्म छात्रवृत्ति कार्यक्रम सञ्चालन गर्ने र एक सदस्य विद्यालयले एक विद्यार्थीलाई पूर्ण दिवा छात्रवृत्ति उपलब्ध गराउने तथा छात्रवृत्तिमा समावेश नभएकाको हकमा भर्ना शुःल्क नलिने गरी विद्यार्थी भर्ना गरिने उल्लेख छ ।
नेपाल प्रहरी श्रीमती संघका तर्फबाट सङ्घकी अध्यक्ष कुसुमलता सिंह र निजी तथा आवासीय विद्यालय अर्गनाइजेसन नेपाल (प्याब्सन)को तर्फबाट अध्यक्ष डीके ढुङ्गानाले आज काठमाडौँमा उक्त सम्झौतापत्रमा हस्ताक्षर गरेकाछन् ।
संघका अध्यक्ष सिंहले शान्ति सुरक्षा तथा अपराध नियन्त्रणका अतिरिक्त प्राकृतिक प्रकोप, आपद् विपद्मा समेत आफ्नो ज्यानको पर्वाह नगरी देश र जनताको लागि खटिएका प्रहरी कर्मचारी, अमर प्रहरी तथा पूर्वप्रहरी कर्मचारीहरूले पुर्याएको योगदानको उच्च मूल्याङ्कन गरी प्याब्सनले प्रदान गरेको सहयोगप्रति कृतज्ञता व्यक्त गरे । उनले आगामी दिनमा समेत संघ र प्याब्सनबिचको सहकार्य र समन्वय भइरहने बताए । प्याब्सनका अध्यक्ष ढुङ्गानाले राम्रो कामको थालनी भएको चर्चा गर्दै शान्ति सुरक्षाका लागि अनवरत खटिने प्रहरी कर्मचारीका सन्ततीलाई शैक्षिक सहयोग गर्न पाउँदा खुसी लागेको बताए ।
साथै नेपाल प्रहरी श्रीमती संघको समन्वय र सहकार्यमा शैक्षिक गुणस्तर स्तरोन्नति गर्न सम्झौताले थप टेवा पुग्ने बताए । प्रस्तुत सम्झौता आगामी २०८१ सालसम्म दुई वर्षका लागि लागू हुने बताइएको छ ।
